ماس رحيم تطلق أولى أغنيات ألبومها الجديد "ضيعتنى"
أطلقت المطربة الشابة ماس رحيم، أولى أغنيات ألبومها الجديد، التى تحمل عنوان "ضيعتنى" من كلمات وألحان والدها الموسيقار الراحل محمد رحيم، وتوزيع موسيقى كريم أسامة.
وكشفت المطربة ماس رحيم، عن مفاجأة خاصة بأغنية "ضيعتنى"، بقولها: "والدى الفنان محمد رحيم هو اللى اختار لى أغنيات الألبوم ومن بينها أغنية "ضيعتنى"، وهى قريبة جدا من قلبي، ولحنها مفاجأة فهو قديم لحنه والدى فى سن الشباب، واللحن موجود فيه إحساسه وتركيبته المعروفة فى الألحان، والدى كان حريص على عمل كل أغنية فى الألبوم حالة خاصة وشبهى، وشايف إن أنا بس اللى هقدر أقدمها، بشخصيتى وبطريقتى وبأسلوبى، وده طبعا زى ما اتعودنا منه، مع اكتشافه لأى موهبة جديدة، بيرسم لها طريقها فى الغناء، وأمثلة كثيرة قدمها بالشكل ده ومنهم الفنانة "روبى".
وأضاف في بيان صحفي لها: "اخترنا سويا أغنية "ضيعتنى"، وهى شبهى زى ما كان بيقول، والأغنية مش حزينة، ومعناها جميل، وتتخطى حاجز العنوان، وكل أغنية فى الألبوم لها قصة وشخصية وموضوع مختلف، وأنا بقدم الألبوم بكل فخر مش علشان نفسى، ولكن علشان والدى، لأن أنا شايفة اللى قدمه رحيم مش قليل، لأنه قدر يغير شكل الموسيقى فى الوطن العربى على مدار 30 عامًا".
وتابعت: "أنا بدأت حب الموسيقى وعمري 5 سنين، وكنت بحس بوالدى والأجواء اللى كلها مزيكا، ده غير الجينات اللى توارثتها عنه، وكنت بكتب وألحن، وكان والدى بيسمعها وبيعجب بها، ولما وصلت إلى 8 سنين بدأت أركب الهارمونى لوحدى- تركيب الهارموني في الموسيقى هو فن تنسيق الأصوات المختلفة معًا في وقت واحد لخلق تأثير موسيقي متناغم- والموضوع ده لفت انتباهه جدا وعرف إنى موهوبة، وبدأ فى تبنى موهبتى، بتعليمى العزف على الآلات الموسيقية مثل البيانو والجيتار، وكنا بنتكلم مع بعض بلغة المزيكا، لو هو عاوز يوصل لى إحساس معين أو العكس لو انا عاوزة أوصل له إحساس خاص، كنا بنغنى لبعض، كان صديقى وصاحبى وكان معايا فى كل حاجة".
واختتمت ماس حديثها قائلة: "أنا شايفة التأثير اللى عمله رحيم لازم يستمر، ويفضل موجود، ونسمع منه الجديد، اللى احنا عرفناه من أعماله نزل، لكن لسه فى كمان حاجات ومفاجآت كتيرة الناس لسه ماتعرفهاش هتنزل مع الوقت، موهبته الفنية بتتعدى الوصف، حياته كلها مزيكا وأنا بالتبعية غصب عنى إتأثرت بيه جدا والناس كلها بتقول إنى شبه والدى، من وانا صغيرة بذاكره، وكل تفاصيله كانت ملهمة بالنسبة لى، ورسالته وطريقة تعبيره عن نفسه كانت بتبهرنى وبتخطفنى، ومن غير ما احس مشيت فى طريق المزيكا بالفطرة، شرف كبير ليا وباحمد ربنا كل يوم إنه خلانى بنته وخلاه أبويا، وأتمنى إن أغنية "ضيعتنى" وجميع أغنيات الألبوم اللى هتنزل تعجب الجمهور".
وتقول كلمات أغنية "ضيعتنى":
ضيعتني منك لله
وجرحتني منك لله
خليتني أحزن على اللي فات
واندم على قلبي وهواه
مش عيب أقول إني اتخدعت
او إني ضيعت لما أنت بيعت
هبدأ حياتي من تاني عادي
أما اللي جاي سيباه لله
وإذا كان اللي فات من عمري
كنت عاشرتك فيه
يبقى أكيد الجاي من عمري هنسى غرامك بيه
وأنا هندم ليه واصبر على إيه
ما صبرت تعبت يا ناس من قولة آل آه من قوله آل آه
وإذا كان اللي فات من عمري
يبقى أكيد الجاي من عمري
وإذا كان اللي فات من عمري
كنت عاشرتك فيه
يبقى أكيد الجاي من عمري هنسى غرامك بيه
وأنا هندم ليه واصبر على إيه
ما صبرت تعبت يا ناس من قولة آل آه من قوله آل آه
ضيعتني منك لله
وجرحتني منك لله
خليتني أحزن على اللي فات
واندم على قلبي وهواه
مش عيب أقول إني اتخدعت
او إني ضيعت لما أنت بيعت
هبدأ حياتي من تاني عادي
أما اللي جاي سيباه لله.
