الفنانة منة شلبي: "أنا هاوية بأجر محترف".. والنجاح أحيانًا صدفة لا علاقة له بالاجتهاد
فسّرت الفنانة منة شلبي عبارتها المثيرة للجدل التي صرّحت بها خلال ندوة مهرجان الجونة السينمائي، حين قالت:"أنا هاوية بأجر محترف"، موضحة أن الشغف هو ما يدفعها للاستمرار والإبداع في التمثيل، رغم حصولها على أجر يليق بالمحترفين.
وأضافت منة:"لازم أفضل هاوية علشان أعرف أشتغل وأبدع، وفي نفس الوقت آخد أجر محترف. لكن المهم إن الأجر ما يزغللش عيني أو يغير تفكيري.. الفنان لازم يذاكر ويعرف إزاي يعمل الدور ويوصل الجمل للمشاهد بصدق، وده جزء من حياتي".
وخلال لقاءها في برنامج "الصورة" مع الإعلامية لميس الحديدي على شاشة النهار، أكدت منة أنها ترفض أداء أي دور لا تشعر بصدقه أو تراه غير واقعي، قائلة:"أرفض الدور لو حسيت إن البطلة مصنوعة، وإنها لازم تبقى أحلى واحدة ومش بتغلط. أكيد فيه ناس طيبين لدرجة خطيرة، بس لازم أصدق البنت دي حتى لو ضد قناعاتي، علشان أحس إنها حقيقية".
"النجاح مش دايمًا مرتبط بالاجتهاد"
وفي تصريح لافت، قالت منة شلبي:"النجاح دايمًا بييجي بالصدفة، ومش شرط يكون له علاقة بالاجتهاد. فيه ناس مظلومة كتير، وفيه ناس تانية مش كده.. بس اللي يهمني إني أكون صادقة مع نفسي وأنا بشتغل".
