الأوقاف: الفريق اللي يخسر النهاردة ممكن يكسب بكرة شجع وافرح بس بأدب

أصدرت مبادرة "صحح مفاهيمك" التابعة لوزارة الأوقاف، منشوراً بخصوص مباراة القمة بين الأهلى والزمالك المقرر لها مساء اليوم، وجاء فى رسالة المبادرة لنبذ العنف : بتخاصم أصحابك… وتتعصب علشان فريق كورة؟.. الكورة لعبة… معمولة علشان المتعة والتشجيع والتنافس الشريف.. لكن لما تتحول لتعصب وخصام وشتايم… ساعتها بتضيع معناها الجميل.

منع التعصب

وتابعت : سيدنا النبي ﷺ قال: «سباب المسلم فسوق، وقتاله كفر» – متفق عليه... وقال ﷺ عن العصبية: «دعوها فإنها منتنة».. يعني ولا في كورة، ولا في تشجيع، ينفع نخسر أخلاقنا أو نجرح غيرنا..الفريق اللي يخسر النهاردة ممكن يكسب بكرة، لكن اللي يخسر احترامه وأصحابه… بيخسر كل حاجة..شجّع، وافرح، بس بأدب..شجع فريقك بحب، من غير ما تظلم أو تجرح..ساعتها هتكون بتعمل دعاية حقيقية لبلدنا وأخلاقنا.

اللهم ألف بين قلوبنا، واهدنا لأحسن الأخلاق، لا يهدي لأحسنها إلا أنت، واصرف عنا سيئها لا يصرف عنا سيئها إلا أنت.