مؤلف «سفاح الجيزة» يتهم المخرج بإضافة «خط درامي» من أجل زوجة المنتج
هاجم مؤلف سفاح الجيزة مخرج العمل هادي الباجوري واتهمه بأنه أضاف خط درامي كامل لم يكن موجودا في الورق من أجل زوجة المنتج، ولفت مؤلف سفاح الجيزة أنه غير راضي عن نهاية العمل.
وقال الكاتب محمد صلاح عزب مؤلف سفاح الجيزة في مداخلة هاتفية مع الإعلامية أميرة بدر من خلال برنامج "ملفات" المذاع على قناة هي "كان في خلاف في وجهات النظر وانا مش راضي وهو غير حاجات في نهاية العمل وانا مش حابب اتكلم في تفاصيل لانها كواليس عمل وهو عمل جماعي وانا مكنتش راضي عن المشاهد ودة مش اللي أنا عامله والطبيعي المخرج يدخل لكن في إطار شغله كمخرج مش أنه يدخل في شغل المؤلف"
وأضاف مؤلف سفاح الجيزة "في خط درامي كامل تم إضافته علشان مرات المنتج تمثل وتم تكوين شخصية من الفراغ ومش معروف هي مين ولا جت ليه وعلشان مرات المنتج تمثل وهو مش امين على الورق بالشكل دة فانا مش هتعامل معاه تاني"
وتابع مؤلف سفاح الجيزة "وانا من البداية مكنتش موافق على المخرج اصلا، وهادي الباجوري مخرج اعلانات أو كليبات لكن اعماله الدرامية مش بحبها والفيلم الوحيد اللي عمله شبه النوع دة هو فيلم وردة ودة فيلم محدش عارفه اصلا ولما المنتج قالي أن دة المخرج اللي هيشتغل معانا قلتله لا"
واختتم مؤلف سفاح الجيزة حديثه عن مخرج العمل هادي الباجوري قائلا "اللي هو صوره زي ما مكتوب معنديش مشكلة فيه وانا مشكلتي في اللي يتعلق بشغلي، والجزء التاني الحق الوحيد فيه ليه للمؤلف"
غياب أحمد فهمي عن الجزء الثاني من سفاح الجيزة
وعن سبب عدم وجود أحمد فهمي قال "وأحمد فهمي مش هيكون موجود لأن قصته خلصت وانا من قبل سفاح الجيزة الرابط بالنسبالي في الأجزاء هو القصص المختلفة ومستوحى من أحداث حقيقية دة اللي بيربط الأجزاء"
يعد مسلسل سفاح الجيزة من الأعمال الدرامية المثيرة للجدل، والتي أثارت أراء الجمهور حولها عبر مواقع التواصل الاجتماعي وذلك بسبب الأداء التمثيلي الذي انتقده الجمهور، والإخراج والعيوب في القصة، كما جاء مفاجأة أن يهاجم مؤلف العمل، مخرجه أمام الجميع بعد الإخلال بالقصة التي كان من المفترض عرضها على الجمهور.
