صفاء جلال تكشف سبب عدم انضمامها لقائمة المطلقات

الفنانة صفاء جلال تحولت إلى حديث وسائل التواصل الاجتماعي خلال الساعات الماضية عقب حوارها مع الإعلامية  ياسمين عز ببرنامج "كلام الناس" والذي أذيع  عبر قناة "إم بي سي مصر".

اعترفت  صفاء جلال أن زوجها اشترط عليها عدم تجسيد دور الراقصة مرة أخرى بعد قيامها بالدور في مسلسل "امرأة من زمن الحب".

قالت صفا جلال: "بعد ما عملت دور راقصة في مسلسل امرأة من زمن الحب جوزي قالي مش هتعملي دور رقاصة تاني، وهو قالي إحنا هنكمل تمثيل بس بلاش دور رقاصة تاني خالص فعشان كدا معملتش دور رقاصة، وسمعت كلامه علشان ميزعلش".

صفاء جلال وكبسولة المعدة  

قالت الفنانة صفاء جلال: "عملت عملية نحت جسم عشان في فترة كنت تخنت أوي وقابلت دكتور وعملت عملية بس بعدها سيبت نفسي وتخنت تاني فبعديها عملت كبسولة المعدة عشان ما كلش، لأني كان عندي مشكلة في الأكل بالليل.

 وأضافت:  كبسولة المعدة كانت لطيفة معايا عشان كنت محتاجة أنزل 10 أو 15 كيلو وفعلا نزلتهم ودلوقت بكمل دايت وبروح الجيم.

وتابعت: ما أفعله مجهود على أي ست وبالذات اللي عدت 45 لأنها بتبقى عارفة أنها بتبذل مجهود اكتر من بنوتة عندها 20 سنة، والمشكلة مش فيا بس عشان الناس متعودين عليا من أيام الضوء الشارد كنت رفيعة جدا وبحاول على قد ما بقدر أوصل لشكل لطيف والناس تتقبله.

صفاء جلال والزعيم عادل إمام

وتحدثت الفنانة صفاء جلال، عن عملها مع الزعيم عادل إمام، قائلة: “اشتغلت مع الزعيم عادل إمام في مسلسل صاحب السعادة، وكان جسمي رفيع، غبت شويه وبعدين جيت أعمل ضيفة شرف معاه في مسلسل عوالم خفية، وكان جسمي مليان، قال لي تخنتي ليه يا صفاء قلت له الاكتئاب، فقال لي أوعي تزعلي ولا تكتئبي افرحي دائما واضحكي على طول وحبي الدنيا ولا تنظري للجانب السلبي في الحياة، وخليكي مبسوطة عمرك ما هتكبري”.

العمر الحقيقي للفنانة صفاء جلال 

وكشفت الفنانة صفاء جلال، عن عمرها الحقيقي على الهواء، قائلة: "أنا داخلة على الـ49 سنة حاليا"، لافتة: "أنا عشت كل مرحلة عمرية بحلوها مرها".

وتابعت: مش بتكسف إني أقول عندي كام سنة، والناس بقيت ذكية أوي يعني مش هطلع أقولهم أنا عندي 35 سنة وعمر ما السن شكل ليا مشكلة.

صفاء جلال والرجل الشرقي 

وقالت الفنانة صفاء جلال،: "90% من زميلاتي مطلقات، بس أنا قررت أتجوز راجل شرقي، أسمع كلامه، وأمشي على مزاجه.

 وأضافت: "الجواز عامة تفاهم واحترام وحاجات كتير، لازم نبقى احنا الاتنين بنشوف إيه اللي يزعل التاني، ومانعملوش، ودايما أول لما بيجيلي دور في عمل فني، لو لقيت فيه أي محاذير أخلاقية؛ مش بعمله، حتى لو بيعملي إيه، هو الحمد لله إحنا بقالنا دلوقتي 24 سنة مع بعض".

وقالت: "الحمد لله أنا مندمتش على حاجة خالص وبحمد ربنا على النعم الكتير جدا اللي ربنا مديهالي زي جوزي وبناتي وأمي وأخواتي وأصحابي وشغلي، ويكفيني وأنا ماشية في الشارع الناس تقولي احنا بنحبك وبنحترمك".