اعتزال أحمد دويدار لاعب الزمالك السابق
أعلن أحمد دويدار، لاعب نادي الزمالك السابق، اعتزاله كرة القدم رسميًا بعد مشوار استمر 16 عامًا مع الساحرة المستديرة، وتمكن من تمثيل منتخب مصر ولعب لأكثر من فريق داخل مصر وخارجها.
وكتب أحمد دويدار -خلال حسابه الشخصي على موقع التواصل الاجتماعي فسيبوك-: الحمد لله على كل شيء ومقتنع وعندي يقين إن محدش بياخد أكتر من نصيبه، أعلن اعتزالي كرة القدم، 16 سنة دوري ممتاز.
وأضاف دويدار: “مريت بإصابة قوية جدا بقطع كلي في وتر أكيلس أثرت على مشواري، والحمد لله خفيت منها ولعبت ورجعت التهابات قوية تاني بنفس الرجل تمنعني من المشاركة بصفة مستمرة، والحمد لله جات في سن كبيير 35 سنة قدرت قبلها أحقق نجاحات كبيرة بشكر ربنا عليها، وكان نفسي في المزيد لكن قدر الله ما شاء فعل، كل الشكر والتقدير لكل شخص اتعاملت معاه في مجال كرة القدم سواء مجالس الإدارات أو المدربين أو اللاعبين الرجالة المحترمة اللي تعاملت معاهم جميعا، والأجهزة الطبية والإدارية، واخواتي عمال غرف الملابس من بدايتي حتى الآن”.
وواصل لاعب الزمالك السابق: “بشكر والدي مثلي الأعلى الله يرحمه، اللي كان نفسي يشوف نجاحاتي ويشوفني وأنا بلعب وأمي اللي وقفت معايا في كل شيء، وسند ليا ولولاها مكنش ربنا كرمني بحب الناس، وربنا يخليها ليا ويديها طول العمر واخواتي البنات اللي بحبهم جدا وأصحابي وعائلتي جميعا، وزوجتي الغالية التي كانت سر نجاحي في كل شيء كانت معايا وقفه بجانبي طوال الوقت، في الحزن قبل الفرح وليها كل الحب والتقدير والاحترام”.
واختتم دويدار: “بشكر أي شخص محترم كان يتمنى الخير ليا، وكان ليا الشرف أني لعبت ومثلت منتخب مصر مع أجيال مختلفة، ونادي اتحاد الشرطة ونادي الإسماعيلي دراويش مصر ونادي سموحة ونادي زد ونادي كاظمة الكويتي، وأخيرًا نادي الزمالك العريق، اللي تربيت فيه، واللي ليه فضل كبير بعد ربنا عليا، وبشكر جمهور نادي الزمالك العظيم اللي واقف معايا وبيدعمني باستمرار، وليهم كل التحية والتقدير شكرا لكم جميعا المشوار لم ينته بعد، الفترة القادمة بداية جديدة في مجال جديد وانطلاقة نحو النجاح إن شاء الله، سواء في الإعلام أو التدريب أو الإدارة، ربنا يوفقني في اختياري وآسف للإطالة”.
