«زعلان من بنات الأبنودي وأحمد عدوية أبونا الروحي في المزيكا الشعبية».. شاهد.. 19 تصريحًا لمحمد منير مع صاحبة السعادة
حل الفنان محمد منير "الكينج"، أمس الثلاثاء، ضيفًا على الفنانة والإعلامية إسعاد يونس، في برنامجها الشهير "صاحبة السعادة" والذي تقدمه عبر فضائية "دي إم سي"، وكشف الكثير من الأمور التي تخص حياته الشخصية ومسيرته المهنية الطويلة.
وخلال السطور التالية يرصد "مستقبل وطن نيوز" أبرز تصريحات الكينج محمد منير في "صاحبة السعادة":
1- كل فنانين مصر زاروني في الفترة الأخيرة "بس روح إخوتي موجودة ".
2- 42 سنة من الكفاح عشان الأجيال الجديدة ماتستعجلش المشوار، ووقفت ووقعت وقمت تأني، "وكل الأيام بتبقي مضطربة ما بين النجاح العظيم والفشل، ولو مدقتش الفشل مكنتش حسيت بطعم النجاح، ولو مدقتش النجاح مكنتش عرفت الاستمرارية وشفت المستقبل".
3- "لما وصلت محطة رمسيس قولت أنا هبقى شيء مهم في البلد ومطرب كبير وذو شأن كبير في التمثيل والغناء، زي ما عاهدت أبويا".
4- في شارع محمد علي كنا بنغني في كازينو النيل، بوظت الدنيا في أول يوم، وقامت شريفة الفاضل، ولبيب مهدي أدوني 20 جنيه، وده كان أول أجر في حياتي.
5- شريفة الفاضل دي كانت جميلة، كانت تسكن في أرقى عمارات مصر، وده قبل ما نشوف مدينة نصر والتجمع والشيخ زايد.
6-" أنا مليش ومش بفهم في إنستجرام واليوتيوب، بس فيه ناس أشغالها على الحاجات دي زي ولادي، وبنديهم 10 جنيه ينبسطوا بيها".
7- "أحمد عدوية بحبه جدًا، أبونا الروحي في المزيكا الشعبية، وكان عنده فرقة كويسة جدًا، الله على خميس حنكش اللي كان في فرقته، كان فيها أسامي ضخمة جدًا وكل مصر في السبعينيات والثمانينيات غنوا مع خميس حنكش".
8- "عائلتي كلها كانت بتتكلم نوبي، ولكن معرفناش نعلم الأجيال الجديدة تتكلمها".
9- "أبويا كان بيبعت لي حوالة كل شهر أصرف منها وأنا طالب في الكلية لمدة 6 سنين، وكان معايا ماجدة هارون زعيمة الطائفة اليهودية".
10- "عنايات وصفي وزوجها محمد شعلان ومنير عامر ساهموا في اكتشافي".
11- "كنت ساكن في المهندسين أيام الجامعة، وجوز أختي الكبيرة كان متبنيني، ولما كنا نلاقي حد بيتكلم إنجليزي كنا نتكلم احنا بالنوبي".
12- "عبد الرحمن الأبنودي كنت بزوره كتير في المستشفى، وكنت عنده في آخر أيامه، وقالي انت اللي تدفني بإيدك، وروحت إسماعيلية دفنته أنا وعلي الحجار".
13- "بنات الأبنودي بناتي، وهما مبيتصلوش بيا وأنا زعلان منهم".
14- "أنا أحسن وقوي بالناس اللي بيحبوني، وعايش بنفسكم وبتنفسكم وبألتراس محمد منير، وأكيد اتعلموا مني درس مهم هو حب الوطن".
15- "رسالة بقولها للأجيال الجديدة حبوا وطنكم ووطنك لو حبيته هيديلك وقيادته هتديلك ".
16- "مصر بالنسبة لي هي سيد درويش ومحمد عبد الوهاب والسنباطي وكمال الطويل وبليغ حمدي، ومحمد قنديل ومحمد عبد المطلب وشفيق جلال وأحمد غانم وأحمد عدوية، وفي الآخر ييجي عمرو دياب ومحمد منير".
17- "حفلاتي في ألمانيا في البداية بالكتير كانت 500 واحد، دلوقتي ليا أكتر من 2 مليون معجب في ألمانيا، ومقدرش أمشي في الشارع".
18- "بنربي ولادنا كويس وبنعلمهم يشاركوا في الانتخابات وأنا علمتهم الموضوع ده عشان وطنهم أولا".
19- "بقول للشعب المصري كله أنا بصحة جيدة والحمد لله أنا بخير وكلي شفاء وسعادة وبتمنى لكل المرضى الشفاء العاجل، وربنا يشيل الأزمة العالمية كورونا".
